galing sa musa

tila sa kalaliman ng aking pagtulog ay may dumating.

tulog. alas singko ng umaga ng ako'y nakatulog. dalawang oras makalipas ay bigla ako namulat sa aking pagkakatulog. alam kong karaniwan sa karamihan ang sa ganitong oras ay magising ngunit hindi para sa akin na sa nakaraang anim na buwan ay kinasanayan nang matulog hanggang alas dose ng tanghali.

gising. mula sa aking paninimbing ay bigla akong nagising. walang ingay o kamay, tanging katahimikan ng umaga ang sakin ay gumising. walang bakas ng pagkaantok o pagka-alimpungat, basta ako ay nagising.

hubad. liban sa suot na puting pang-ibaba ay natulog akong hubad. sa biglaang paggising aking hinubad ang puting pang-ibaba. tumambad sa mga mata kong gising ang aking hinubarang katawan. ako ay hubad.

guhit. tinitignan ko ang aking katawang hubad, ang kutis na kayumanggi, ang bawat kurba, ang bawat butas, ang paglubog at pag-umbok, bawat malambot at matigas na masel, bawat hibla, at bawat guhit. nakaramdam ako ng matinding pagnanasang gumuhit. aking iginuhit ang sariling anyo gamit ang papel at monggol na dinampot mula sa sahig.

tila sa aking pagtulog ay may dumating, nanggising at nagtulak sa aking mga hubad na kamay upang gumuhit.

ang guhit ay nagsimula sa mga daliri ng kaliwang paang itinaas sa kanang tuhod. patuloy ang guhit sa paa pababa sa binting mabuhok, sa tuhod, sa makinis na hita, sa kanang tuhod na bumubuhat sa paang mabigat, sa kanang hita, sa kanang binti, at sa kung anong nasa gitna na nakikiliti sa bawat pagdaan ng guhit.

nakakakiliti. nakakabuhay. sa pagkakiliti at pagkabuhay ng aking ari ang siya ring pagkakiliti ng imahinasyon at pagkabuhay ng diwa. ang guhit ay nagpatuloy sa madona at supling, sa kung anu-anong nakasabit sa dingding, at sa mga hubad sa mga magasin. ang guhit ay nagpatuloy sa udyok ng bagong gising na libog.

tila sa aking pagtulog ay may dumating, nangiliti at nanggising ng kalibugang nahihimbing.

* * *

ang larawan sa itaas ay isa sa mga bunga ng kalibugan ng araw na yun. ito ay hango sa larawan ng isang lalaki sa isang magasin. ito ay aking iginuhit gamit ang lapis at bahagyang inedit sa photoshop. ang likhang ito ay aking tatawaging "mukha sa magasin."

todo pilit din ako nagtagalog dito dahil kasi bukod sa pagguhit ay ginanahan din ako magbasa ng araw na yun. ang aklat na nadampot ko ay puno ng mga maiikling sanaysay sa wikang filipino.